कपिलवस्तु, — नेपाली कांग्रेस कपिलवस्तु निर्वाचन क्षेत्र नम्बर १ का उम्मेदवार अतहर कमाल मुसलमानले आफू इमानदार छविका आधारमा निर्वाचन जित्ने र मन्त्री बन्ने दाबी गर्नुभएको छ। नेपाली कांग्रेस क्षेत्र नम्बर १ प्रदेशसभा (ख) क्षेत्रीय समितिले मायादेवी गाउँपालिका पकडीमा आयोजना गरेको कार्यकर्ता भेला, छलफल तथा अन्तरक्रिया कार्यक्रमलाई सम्बोधन गर्दै उहाँले उक्त दाबी गर्नुभएको हो। गत वर्ष ओपन हार्ट सर्जरीपश्चात गम्भीर अवस्थाबाट फर्किएको स्मरण गर्दै कमालले भन्नुभयो, “म सायद आज तपाईंहरूबीच नहुन पनि सक्थेँ। नागरिकको आशीर्वाद, सत्कर्म, निष्ठा र इमान्दारिताका कारण जीवनदान पाएको हुँ। मृत्युबाट फर्किएको मानिसलाई गलत व्यक्तिसँग डर लाग्दैन। जनताको गुन चुनाव जितेर क्षेत्रको विकास गरेर तिर्छु।” संविधानसभा सदस्यसमेत रहनुभएका कमालले २०७० सालमा स्वतन्त्र रूपमा निर्वाचन जिते पनि पार्टी निष्ठामा कायम रहेकाले यसपटक पार्टीबाट उम्मेदवार बनेको बताउनुभयो। सभापति गगन थापाको नेतृत्वमा सरकार बने आफू मन्त्री बन्ने विश्वाससमेत व्यक्त गर्नुभयो। उहाँले २०४८ सालदेखि विकासबाट पछि परेको क्षेत्रमा आफू र पूर्व प्रदेश भौतिक योजना मन्त्री सहसराम यादवले पूर्वाधार, सिँचाइ र स्वास्थ्य क्षेत्रमा काम गरेको उल्लेख गर्नुभयो। “२०७० सालमा स्वतन्त्र लड्दा अग्रज नेता राजेश आचार्यसँग क्षमा मागिसकेको छु, अहिले हामी एकै ठाउँमा छौं,” उहाँले भन्नुभयो। निर्वाचन परिणाम कांग्रेसकै पक्षमा आउने दाबी गर्दै उहाँले कार्यकर्तालाई ढुक्क भएर तयारीमा लाग्न आग्रह गर्नुभयो। कार्यक्रममा पूर्व पार्टी सभापति तथा लुम्बिनी प्रदेशसभा सदस्य सुधाकर पाण्डेयले लोकतन्त्र र अधिकार संरक्षणका लागि कांग्रेसका उम्मेदवारलाई विजयी गराउन आग्रह गर्नुभयो। जिल्ला सभापति अब्दुल कलामले तीनवटै निर्वाचन क्षेत्रमा पार्टी उम्मेदवारलाई जिताउन अपिल गर्नुभयो। पूर्व प्रदेशमन्त्री सहसराम यादवले क्षेत्रको विकासलाई निरन्तरता दिन अतहर कमाललाई विजयी गराउन आवश्यक रहेको बताउनुभयो। पूर्व पार्टी सभापति राजेश आचार्यले पार्टीभित्र एकता कायम गरी कांग्रेसलाई जिताउनुपर्नेमा जोड दिनुभयो। कार्यक्रममा नेता ललित गुरुङ, रामआशिष पाण्डेय, शोहरत तेली, विश्वम्भर कुर्मी, वजिह अरसद तथा वलीउद्दिन मुसलमानलगायतले पनि धारणा राख्नुभएको थियो।