कपिलवस्तु, २६ साउन ।
कपिलवस्तु जिल्लाको मायादेवी साझेदारी वन उपभोक्ता समूह देशभरमै तेस्रो भई पुरस्कृत भएको छ । साझेदारी वनको संरक्षण, संबद्र्धन, दिगो उपयोग, बातावरण सन्तुलन तथा जैविक बिबिधता संरक्षणमा एवं गरिबी न्यूनिकरणमा उल्लेखनीय कार्य गरेकामा सामुदायिक वन दिवश २०८२ को अवसर पारेर साझेदारी वन सम्मानित भएको हो ।
साझेदारी वनलाई नगद २५ हजार सहित प्रमाणपत्र हस्तान्तरण गरिएको थियो । दिवशको कार्यक्रममा वन तथा वातावरण मन्त्री ऐनबहादुर शाही ठकुरी, मन्त्रालयका सचिव डा राजेन्द्रकुमार मिश्र र वन तथा भू–संरक्षण बिभागका महानिर्देशक बद्रिराज ढुंगानाले साझेदारी वनका अध्यक्ष दिनेश प्रसाद जयसवाल र उपाध्यक्ष शैलेन्द्र कुमार यादवलाई पुरस्कार हस्तान्तरण गरेका थिए ।
मन्त्रालयले डिभिजन वन कार्यालय कपिलवस्तुलाई समेत कार्यक्रममा सम्मानित गरेको थियो । कार्यक्रममा डिभिजनका बरिष्ठ वन अधिकृत मदन ढुंगानालाई सम्मानपत्र हस्तान्तरण गरिएको थियो ।
कार्यक्रममा साझेदारी वन तर्फ मध्यविन्दु साझेदारी वन उपभोक्ता समूह प्रथम, बेलबारी चिसाङ साझेदारी वन उपभोक्ता समूह द्वितीय भई पुरस्कृत भएका थिए ।
मायादेवी साझेदारी वन उपभोक्ता समुहका अध्यक्ष दिनेश प्रसाद जयसवालले साझेदारी वनलाई पुरस्कार प्राप्त सहयोग गर्ने सबैलाई धन्यबाद दिदै आगामी दिनमा अझै उत्कृष्ट कार्य सम्पादन गर्न पुरस्कारले प्रेरणा प्रदान गरेको बताए ।
कपिलवस्तुको ऐतिहासिक सामाजिक आर्थिक सांस्कृतिक र समग्र कपिलवस्तुको उत्सवको रुपमा २०६५ साल देखि बुद्ध रङ्गशालामा कपिलवस्तु महोत्सव आयोजना हुँदै आएको छ । महोत्सवले जिल्लाको पहिचान, सम्भावना र अवसरलाई देश तथा विदेशमा चिनाउने कार्य गर्दै र यसै सन्दर्भमा २०६८ साल देखि कपिलवस्तु उद्योग वाणिज्य संघ र वाणगंगा वेलफेयर सोसाईटीले आलोपालोको सहकार्यमा कपिलवस्तु महोत्सव आयोजना गर्दै आईरहेको बाणगंगा वेयलफेयर सोसाइटीले विज्ञप्ति मार्फत जानकारी गराएको छ ।
बाणगंगा वेयलफेयरका अध्यक्ष राजकुमार खाँणद्वारा हस्ताक्षरित विज्ञप्तिमा कपिलवस्तु महोत्सवको १६औं संस्करण वाणगंगा वेलफेयर सोसाईटीको मुख्य आयोजनामा पूर्वनिर्धारीत समय अनुसार मिति २०८२ मङसिर १८ गते देखि पौष १ गते सम्म बुद्ध रङ्गशालमा “ १६औं कपिलवस्तु महोत्सव एवम् कृर्षि पर्यटन तथा औद्योगिक प्रदर्शनी २०८२” को मिति कंपिलवस्तु उद्योग वाणिज्य संघले आयोजना गरेको १५ औं कपिलवस्तु महोत्सवको मञ्च बाट घोषणा गरी आम नागरीक उद्योगी व्यवसायी सम्बन्धित सबै निकायहरुमा सूचना सम्प्रेषण गरी महोत्सवमा सहकार्य गरी सफल बनाउन आह्वान गरेको उल्लेख छ ।
महोत्सव कुनै व्यक्तिगत वा प्रतिस्पर्धात्मक स्वार्थी कार्य नभई समग्र कपिलवस्तुको पहिचान र समृद्धिको अभियान हो, जसमा सबै पक्षको एकता र सहयोगको अपेक्षा गर्दछौँ । बाणगंगा वेलफेयर सोसाईटी र कपिलवस्तु उद्योग वाणिज्य संघको विगत लामो समय देखिको सहमति र सहकार्य अनुसार हामी १६औं कपिलवस्तु महोत्सवको तयारीमा जुटेको अवस्थामा अन्य कुनै सँस्थाले हामीसँग कुनै पनि सहकार्य र छलफल नगरी महोत्सव प्रभावित पार्ने उद्देश्यले मिति जुधाई प्रथम राष्ट्रिय औद्योगिक प्रदशनीको तयारी गरिरहँदा यस कार्यले संस्थागत द्वन्द सिर्जना उत्पन्न हुने गरी भ्रम सिर्जना नगर्न र नगराउन विज्ञप्तिमा अनुरोध गरिएको छ ।
