14:09:01कपिलवस्तु, बाणगंगा –
हालै स्थापना भएको स्काई ब्लु एजुकेशन कन्सल्टेन्सी प्राली बाणगंगा–४ चारनम्बरले विदेश अध्ययनको तयारीमा रहेका विद्यार्थीहरूलाई लक्षित गर्दै एक दिवसीय अन्तरक्रिया कार्यक्रम सम्पन्न गरेको छ। छोटो समयमै उल्लेखनीय सक्रियता देखाएको संस्थाले यो कार्यक्रममार्फत विद्यार्थीहरूलाई मार्गदर्शन र प्रेरणा प्रदान गरेको छ।
जापान, कोरिया, क्यानडा तथा युरोपेली मुलुकहरूमा अध्ययनको तयारी गरिरहेका विद्यार्थीहरूका लागि आयोजना गरिएको उक्त कार्यक्रममा आवश्यक भाषा दक्षता, सीप विकास, भिसा प्रक्रिया, संस्कृतिक अनुकूलन र विदेश पुगेपछिको व्यवहारिक अवस्थाबारे विस्तृत प्रशिक्षण प्रदान गरिएको थियो।
जापान जान चाहने विद्यार्थीहरूलाई प्रशिक्षक मनुष सापकोटाले जापानीज भाषा, सामाजिक आचरण र जीवनशैलीसम्बन्धी जानकारी दिनुभयो भने कोरीयाका लागि कोरीयन भाषा शिक्षक गोपाल घिमिरेले प्रकास पार्नुभएको थियो यस्तै, युरोपतर्फ लक्ष्य राखेका विद्यार्थीहरूलाई प्रशिक्षक श्री पौडेलले अध्ययन र रोजगारीसँग सम्बन्धित आवश्यक विषयहरूमा मार्गदर्शन गर्नुभयो।
कार्यक्रमका प्रमुख अतिथि बुद्धभूमि नगरपालिकाका कार्यपालिका सदस्य नारायण खड्काले स्काई ब्लु कन्सल्टेन्सीले देखाएको प्रगति र विद्यार्थी–केन्द्रित प्रयासको प्रशंसा गर्दै भन्नुभयो, “विदेशमा प्राप्त सीप र प्रविधिलाई स्वदेशमै प्रयोग गरी राष्ट्र निर्माणमा योगदान पुर्याउनु आजको आवश्यकता हो।”
विशिष्ट अतिथि एनएमबि बैंक, गोरुसिंगे शाखाका प्रमुख केशर सिंह टन्डनले विद्यार्थीहरूको भिसा प्रक्रियामा बैंकिङ सेवा र सहजीकरणका लागि संस्थागत सहयोग प्रदान गर्ने प्रतिबद्धता व्यक्त गर्नुभयो।
कार्यक्रमको अध्यक्षता स्काई ब्लुका सीईओ सुसिल केसीले गर्नुभएको थियो भने स्वागत मन्तव्य जापानीज भाषा शिक्षक श्री न्यौपानेले दिनुभएको थियो। कार्यक्रमको सञ्चालन संस्थाका प्रबन्ध निर्देशक सुसिल खत्रीले गर्नुभएको थियो। भाषा शिक्षकहरू र विद्यार्थीहरूको उत्साहजनक सहभागिताले कार्यक्रमलाई अझ प्रभावकारी बनाएको थियो।
हाल स्काई ब्लु एजुकेशन कन्सल्टेन्सीले कोरियन र जापानीज भाषाका कक्षाहरू सञ्चालन गर्दै आएको छ। साथै, विदेश जान चाहने विद्यार्थीहरूलाई आवश्यक तयारी, व्यवहारिक सीप, र परामर्श सेवा प्रदान गर्दै आएको संस्थाले आगामी दिनमा अझ प्रभावकारी कार्यक्रमहरू अघि ल्याउने प्रतिबद्धता जनाएको छ।
देशको अन्न भण्डारका रूपमा चिनिने मधेस प्रदेशमा यस वर्षको मनसुन प्रतिकूल भएपछि धान रोपाइँ गम्भीर रूपमा प्रभावित भएको छ। भूमि व्यवस्था, कृषि तथा सहकारी मन्त्रालयका अनुसार हालसम्म प्रदेशमा जम्मा ४७ प्रतिशत मात्र रोपाइँ सम्पन्न भएको छ।
लामो समयदेखि पानी नपर्दा किसानको चिन्ता बढेको छ। विशेषगरी महोत्तरी जिल्लामा रोपाइँको प्रगति झन् न्यून, करिब ३० प्रतिशत मात्र पुगेको छ। कुल ७१ हजार ५७० हेक्टर खेतीयोग्य जमिन रहेको जिल्लामा करिब ६४ हजार ९७७ हेक्टरमा धान खेती हुँदै आएको छ।
जिल्लाको उत्तर–पश्चिमी क्षेत्रमा किसानले मोटर, डिजेल पम्प, नदीनाला, इनार, कुवार स्यालो र ट्युबवेलको सहयोगमा करिब २५ प्रतिशत रोपाइँ गर्न सफल भएका छन्। तर, जिल्लाभर रोपाइँको अवस्था सन्तोषजनक छैन।
पानीको कमीले गर्दा खेतका ब्याड सुक्न थालेका छन् भने रोपिएका धानका बिरुवामा पनि धाँजा फाट्न थालेका छन्।
मधेस प्रदेश सरकारले सिफारिस गरेपछि सङ्घीय मन्त्रिपरिषद्ले प्रदेशलाई तीन महिनाका लागि विपद् सङ्कटग्रस्त क्षेत्र घोषणा गरिसकेको छ।
प्रधानमन्त्री केपी शर्मा ओलीले हिजो हेलिकप्टरमार्फत मधेसको सुक्खा प्रभावित क्षेत्रको अवलोकन गरेका थिए। अवलोकनपछि उनले मधेसका किसानलाई राहत पुर्याउने कार्यक्रमका लागि सरकार प्रतिबद्ध रहेको बताएका छन्।
महोत्तरीको मटिहानी नगरपालिका–७ र ८ का खेतहरू अधिकांश सुख्खा छन्। केही किसानले पम्पसेटको सहायताले रोपाइँ गरे पनि, पानीको अभावमा खेतमा चिरा पर्न थालेका छन्।
त्यही गाउँका स्थानीय इस्लाम कवाडी भन्छन्–
“यो वर्ष खेतीको लागि मात्रै होइन, पिउनकै लागि पनि कलमा पानी आउँदैन। खेती पनि आकाशको पानीको भरमा गर्नु पर्ने, खै यो साल त खेती हुँदैन जस्तो छ।”
यस्तै, स्थानीय शान्ति खतुवा भन्छिन्–
“खडेरी र सुख्खाका कारण हामीसँग खेती नभएको हो। पैसा हुनेहरूले त पम्पसेट चलाएर केही रोपे, हामी जस्ता गरीब किसानलाई भने आकाशको पानीमै भर पर्नु परेको छ।”
महोत्तरीसहित मधेसका किसान अहिले पानीका लागि आकाशतर्फ हेर्दै प्रार्थना गरिरहेका छन्।
कसैले स्थानीय सरकार र सम्बन्धित निकायको सहयोग र राहतको अपेक्षा गरेका छन्, भने कसैले वर्षाले साथ देओस् भनेर आकाशतिर हात उठाएका छन्।
