कपिलवस्तु,
कपिलवस्तुको मायादेवी साझेदारी वन उपभोक्ता समूहले वन क्षेत्रभित्र ट्र्याक्टर प्रयोग गरी भइरहेको खनजोत तथा अतिक्रमण कार्य तत्काल रोक्न सम्बन्धित पक्षलाई आग्रह गरेको छ। समूहले नेपाल किसान ट्र्याक्टर समिति कपिलवस्तुलाई पत्राचार गर्दै वन क्षेत्र संरक्षणमा सहयोग गर्न अनुरोध गरेको हो।
मायादेवी साझेदारी वन उपभोक्ता समूह वाणगंगा–२ र १०, कपिलवस्तुद्वारा जारी पत्रमा पिपरा तथा पटना वन क्षेत्रभित्र केही व्यक्तिहरूले ट्र्याक्टर प्रयोग गरी वन अतिक्रमण गर्दै खनजोत गरिरहेको जानकारी प्राप्त भएको उल्लेख गरिएको छ। वन क्षेत्रभित्र भइरहेको यस्तो गतिविधिले वन संरक्षण, जैविक विविधता तथा वातावरणीय सन्तुलनमा प्रत्यक्ष असर पर्ने भन्दै समूहले गम्भीर ध्यानाकर्षण भएको जनाएको छ।
समूहले नेपाल किसान ट्र्याक्टर समितिमा आबद्ध ट्र्याक्टर धनी तथा चालकहरूलाई वन क्षेत्रभित्र कुनै पनि प्रकारको खनजोत नगर्न तथा यस्ता गतिविधिमा संलग्न नहुन सचेत गराउन अनुरोध गरेको छ। वन क्षेत्र अतिक्रमण गरी खेती विस्तार गर्ने वा प्राकृतिक स्रोतको दुरुपयोग गर्ने कार्य कानुनविपरीत भएको उल्लेख गर्दै यस्तो गतिविधि रोक्न सबै पक्ष जिम्मेवार हुनुपर्ने समूहको भनाइ छ।
पत्रमा वन अतिक्रमण तथा अवैध खनजोत कार्य नरोकिए प्रचलित कानून बमोजिम आवश्यक कारबाही प्रक्रिया अघि बढाइने चेतावनीसमेत दिइएको छ। वन संरक्षणमा स्थानीय समुदाय, किसान तथा सरोकारवाला निकायबीच सहकार्य आवश्यक रहेको उल्लेख गर्दै समूहले प्राकृतिक सम्पदाको संरक्षण सबैको साझा दायित्व भएको जनाएको छ।
मायादेवी साझेदारी वन उपभोक्ता समूहका अध्यक्ष दिनेश प्रसाद जयसवालद्वारा हस्ताक्षरित उक्त पत्रको बोधार्थ डिभिजन वन कार्यालय तौलिहवा तथा सब डिभिजन वन कार्यालय पिपरा/पटनालाई समेत पठाइएको छ। वन क्षेत्र संरक्षण र अतिक्रमण नियन्त्रणका लागि सम्बन्धित निकायले आवश्यक अनुगमन तथा कारबाही प्रक्रिया अघि बढाउनेछ।
