१४ भदौ, बुटवल । लुम्बिनी सांस्कृतिक नगरपालिकाका नगर प्रमुख सजरुद्दिन मुसलमान (खान) को निधन भएको छ ।
नगर प्रमुख खानको आज बिहान ९ बजे हृदयघातका कारण निधन भएको लुम्बिनी सांस्कृतिक नगरपालिका-३ का वडाध्यक्ष अकरामुद्दिन नाउ मुसलमानले बताए ।
नगर प्रमुख सजरुद्दिन शुक्रबार मात्रै मलेशिया भ्रमणबाट घर फर्केका थिए ।
बिहान स्वास्थ्यमा समस्या आएपछि युनिभर्सल मेडिकल कलेज भैरहवा लैजाने क्रममा बाटोमै उनको मृत्यु भएको वडाध्यक्ष मुसलमानले जानकारी दिए ।
‘उहाँ हिजो (शुक्रबार)मात्रै मलेशयिाबाट फर्कनु भएको थियो, हिजो राति सुत्दा र बिहान उठ्दासम्म राम्रै थियो, बिहान उठेपछि अप्ठेरो भयो भनेपछि मेडिकल कलेज लैजादैं गर्दा निधन भएको हो’, वडाध्यक्ष मुसलमानले भने ।
मेयर खान नेपाली कांग्रेसबाट निर्वाचित भएका थिए । उनी ७० वर्षका हुन् ।
उनको आजै साँझ ५ बजे स्थानीय कब्रिस्तानमा परम्परागत रुपमा अन्त्येष्टि गरिने नगरपालिकाका समन्वयकर्ता तुलसीराम लामिछानेले जानकारी दिए ।
कपिलवस्तु ।
वाणगंगा नगरपालिका–१ मा नयाँ उद्यम “चिया साथी क्याफे” सञ्चालनको अन्तिम तयारी पूरा भएको छ । आउँदो भाद्र १६ गते सोमबार यस क्षेत्रका सफल युवा व्यवसायी आशिष शर्माले क्याफेको औपचारिक उद्घाटन गर्ने भएका छन् ।
लोकप्रिय युवा तथा समाजसेवी तिलकराम (टीआर) पाण्डेद्वारा सञ्चालनमा ल्याउन लागिएको यो क्याफे आत्मीयता र मित्रतालाई जोड्ने उद्देश्यले सुरु गरिएको हो । क्याफेमार्फत स्थानीयवासीलाई स्वस्थ वातावरणमा चिया–कफी लगायतका परिकार उपलब्ध गराउने व्यवस्था मिलाइएको पाण्डेले जानकारी दिएका छन् ।
पाण्डेले भने, “यो क्याफे केवल व्यवसाय नभई मित्रता र सद्भाव बाँड्ने साझा थलो होस् भन्ने हाम्रो चाहना हो ।” उनका अनुसार उद्यमशीलता मात्र नभई सामाजिक आत्मीयता र सद्भावलाई संस्थागत गर्ने अभिप्राय पनि क्याफेले बोकेको छ ।
शैक्षिक र सामाजिक क्षेत्रमा सक्रिय भूमिका निर्वाह गर्दै आएका पाण्डेले यस पटक व्यवसायलाई पनि सामाजिक सम्बन्ध र आत्मीयतासँग जोड्ने नयाँ प्रयास गरेका छन् ।
क्याफेको नाम जस्तै यहाँको मूल ध्येय सबै उमेर, वर्ग र पेसाका मानिसलाई आत्मीय वातावरणमा जोड्नु हो । व्यस्त जीवनशैलीबीच केही बेर आराम लिन सक्ने, परिवार, साथीभाइ वा व्यवसायिक भेटघाट गर्न सक्ने स्थानको आवश्यकता स्थानीय युवाले लामो समयदेखि महसुस गर्दै आएका थिए । “चिया साथी” त्यसकै परिकल्पना र व्यवहारिक स्वरूप भएको पाण्डे बताउँछन् ।
सजावटमा फरकपन ल्याइएको यस क्याफेमा स्थानीय स्वादलाई प्राथमिकता दिइने व्यवस्था मिलाइएको छ ।
यसरी वाणगंगामा सुरु हुन लागेको “चिया साथी क्याफे” केवल व्यवसायिक पहल मात्र नभई आत्मीयता, मित्रता र सामाजिक सम्बन्धलाई बलियो बनाउने नयाँ थलोका रूपमा प्रस्तुत भएको छ ।
