कपिलवस्तु, भदौ २४ ।
नेपालमा जारी आन्दोलनका क्रममा निर्दोष नागरिकको हत्या भएको घटनाप्रति कपिलवस्तु नागरिक समाजले गहिरो दुःख प्रकट गर्दै कडा निन्दा गरेको छ ।
समाजका अध्यक्ष अर्जुन प्रसाद पोख्रेलले विज्ञप्ति जारी गर्दै दिवंगत आत्माहरूको चिरशान्ति, शोकाकुल परिवारप्रति हार्दिक संवेदना र घाइतेहरूको शीघ्र स्वास्थ्यलाभको शुभकामना व्यक्त गरेका छन् ।
विज्ञप्तिमा हाल देशभर फैलिएको भ्रष्टाचार, कुसासन र सरकारविहीन अवस्थाको कारण आन्दोलन उग्र बन्न पुगेको उल्लेख गर्दै जनधनको ठूलो क्षति भएकोप्रति चिन्ता प्रकट गरिएको छ ।
नागरिक समाजले सबै युवाहरू र आम नागरिकलाई संयमित भई शान्तिपूर्ण ढंगले विधिको शासन कायम गर्न, विधिसम्मत तरिकाबाट राष्ट्रनिर्माणमा सहभागी हुन र थप मानवीय तथा भौतिक क्षति हुन नदिन आह्वान गरेको छ ।
“राष्ट्र निर्माणको संवेदनशील घडीमा जनताको भावना अनुरूप शासन व्यवस्था कायम गर्न र शान्तिपूर्ण निकास दिन सबै सरोकारवालाले जिम्मेवारी लिनुपर्नेछ,” विज्ञप्तिमा भनिएको छ ।
