दुई दशकदेखि मेलमिलाप प्रक्रियालाई संस्थागत रूपमा अघि बढाउँदै आएको संस्था प्रो पब्लिक नेपालले कपिलवस्तुको शिवराज नगरपालिकासँग सहकार्य अघि बढाएको छ ।
दुई दशकदेखि सुशासन, पारदर्शिता, मानव अधिकार तथा न्यायमा पहुँचका क्षेत्रमा क्रियाशील जनहित संरक्षण मञ्च – प्रो.पब्लिक र शिवराज नगरपालिकाको संयुक्त आयोजनामा चैत्र १७ गते नागरिक शान्ति सेवा कार्यक्रमको शुभारम्भ तथा समन्वय बैठक सम्पन्न भएको हो ।
कार्यक्रमका प्रमुख अतिथि तथा शिवराज नगरपालिकाका नगर प्रमुख अजय थापाले वडा स्तरमै विवाद समाधान हुने भएकाले यस कार्यक्रमलाई नगरपालिकाले आर्थिक, नैतिक तथा भौतिक रूपमा सहयोग गर्ने प्रतिबद्धता व्यक्त गर्नुभयो ।
प्रो पब्लिकका महासचिव धिरज पोख्रेलले कपिलवस्तुको बुद्धभूमी नगरपालिकामा विगत तीन वर्षदेखि कार्यक्रम सफलतापूर्वक सञ्चालन हुँदै आएको अनुभवका आधारमा शिवराज नगरपालिकामा पनि कार्यक्रम प्रभावकारी हुने विश्वास व्यक्त गर्नुभयो ।
प्रो पब्लिकका कार्यकारी निर्देशक बाबुराम पौडेलका अनुसार विगत २० वर्षमा करिब १५ हजार विवाद मेलमिलापमार्फत समाधान गरिएको छ, जसमा संस्थाले हेरेका ९५ प्रतिशत विवाद सफलतापूर्वक मिलाइएको जानकारी दिनुभयो ।
कार्यक्रमकी अध्यक्ष तथा शिवराज नगरपालिकाकी उपप्रमुख शिवकुमारी चौधरीले अघिल्लो कार्यकालमै यस्तो अभ्यास गरिएको स्मरण गराउँदै प्रत्येक वडामा तिनतिन जना मेलमिलापकर्ता चयन गरिएको भए पनि पुनर्ताजगी तालिम नहुँदा केही समस्या आएको बताउनुभयो ।
अब भने प्रो पब्लिकसँगको सहकार्यमा प्रत्येक वडाबाट नयाँ मेलमिलापकर्ता छनोट गरी तालिम दिइने र पुराना मेलमिलापकर्तालाई पुनर्ताजगी तालिम प्रदान गरिने जानकारी दिनुभयो ।
यसैबीच, नागरिक शान्ति सेवा कार्यक्रम सञ्चालनका लागि प्रो पब्लिक नेपाल र शिवराज नगरपालिका बीच आगामी दुई वर्षका लागि सहमति पत्रमा हस्ताक्षर समेत गरिएको छ।
कार्यक्रम संयोजक झबिन्द्र अधिकारीको सञ्चालनमा सम्पन्न कार्यक्रममा नगरपालिकाका वडा अध्यक्ष, कर्मचारी तथा विभिन्न संघसंस्थाका प्रतिनिधिहरूको सहभागिता रहेको थियो।
यस कार्यक्रमले शिवराज नगरपालिकाको न्यायिक समितिलाई थप सहजता प्रदान गर्ने अपेक्षा गरिएको छ । 
