शोभा भुसाल,
मंसिर१६, बाणगंगा 
। आगामी मंसिर १८ गतेदेखि पुस १ गतेसम्म बाणगंगास्थित बुद्ध रंगशालामा सञ्चालन हुने १६ औं कपिलवस्तु महोत्सव तथा कृषि, पर्यटन र औद्योगिक प्रदर्शनी–२०८२ को करिब ८० प्रतिशत तयारी पूरा भएको आयोजकले जनाएको छ। बाणगंगा वेलफेयर सोसाइटीको आयोजनामा हुने महोत्सवका अधिकांश संरचनागत कामहरू अन्तिम चरणमा पुगेका छन्।
सोसाइटीका अध्यक्ष तथा महोत्सव संयोजक राजकुमार खाँणले तयारी तीव्र गतिमा भइरहेको उल्लेख गर्दै मंसिर १७ गतेसम्म सम्पूर्ण काम सकिने जानकारी दिनुभयो। उहाँका अनुसार महोत्सवको इन्सुरेन्स गरिसकिएको छ भने सुरक्षा व्यवस्थालाई विशेष कडाइका साथ अघि बढाइनेछ।
यस वर्षका लागि करिब ३०० स्टल रहने महोत्सवमा महिला उद्यमी, स्थानीय उद्योग तथा घरेलु उत्पादकलाई सहुलियत दरमा स्टल उपलब्ध गराइएको स्टल संयोजक मिन थापाले जानकारी दिनुभयो। उहाँले केही स्टल अझै खाली रहेको भन्दै इच्छुक उद्योगी–व्यवसायीलाई शीघ्र सम्पर्क गर्न आग्रह गर्नुभयो।
यही बीच, महोत्सवका प्रमुख आकर्षण स्नो सिटी (हिउँ खेल्ने अनुभव), जलपरी, सुनामी पिङ लगायतका संरचना निर्माण तीव्र गतिमा भइरहेको सोसाइटीका सचिव युवराज पन्थीले बताए। विविध मनोरञ्जन र दृश्य–अनुभूति दिने यस्ता संरचनाले दर्शकको आकर्षण बढाउने विश्वास लिइएको छ।
सिद्धार्थ सामाजिक विकास केन्द्रका अध्यक्ष त्रिलोचन घिमिरेले कपिलवस्तुको ऐतिहासिक पहिचान, पर्यटन प्रवर्द्धन र स्थानीय सहभागीता बढाउने उद्देश्यले महोत्सव आयोजना भएको बताउँदै जिल्लावासी तथा छिमेकी जिल्लाका नागरिकलाई अवलोकनका लागि निम्तो गर्नुभयो।
महोत्सवमा १४ औं कपिलवस्तु डान्स आइडल प्रतियोगिता, मम्मी डान्स, राष्ट्रिय तथा स्थानीय कलाकारहरूको प्रस्तुति, सांस्कृतिक कार्यक्रम, खाद्यान्न स्टल, व्यापारिक प्रदर्शनी, बालउद्यान तथा विविध मनोरञ्जनात्मक गतिविधि रहनेछन्। यी सबै आकर्षणका कारण बाणगंगासहित वरपरका जिल्लाबाट समेत ठूलो संख्यामा दर्शक उपस्थिति हुने अपेक्षा गरिएको छ।
स्थानीय तह, उद्योगी–व्यवसायी, समाजसेवी तथा विभिन्न सरोकारवालाको समन्वयमा आयोजना हुने यो महोत्सवले लुम्बिनी प्रदेशको व्यापार, पर्यटन र स्थानीय उत्पादन प्रवर्द्धनमा योगदान गर्ने विश्वास व्यक्त गरिएको छ। कपिलवस्तुमा परम्परागत रूपमा आइरहेका यस्ता मेला–महोत्सवले जिल्लाको समग्र विकास र पहिचान मजबुत बनाउन महत्वपूर्ण भूमिका खेल्दै आएका छन्।
