लक्ष्मण सापकोटा,
कपिलवस्तु
वैज्ञानिक वन व्यवस्थापन उपभोक्ता राष्ट्रिय महासंघ नेपाल को चौथो वार्षिक उत्सव कार्यक्रम सोमबार कपिलवस्तुको मायादेवी रिसोर्टमा सम्पन्न भएको छ ।
कार्यक्रमका प्रमुख अतिथि लुम्बिनी प्रदेशका वन मन्त्री देवप्रसाद कलवारले वन सदुपयोग गर्न नसकेकोप्रति चिन्ता व्यक्त गर्दै वन व्यवस्थापन गर्न सकेको खण्डमा कसैको अघि हात फैलाउन नपर्ने र वनबाटै राष्ट्रको समृद्धि हुने जिकिर गर्नुभयो । अन्य मुलुकबाट आयातित काठ को प्रयोग रोकी आफ्नै देशमा आफ्नै देशको काठ प्रयोग गर्न आग्रह गर्नुभयो , उहाँले कुनै पनि खाली ठाउँ नराखी वृक्षारोपण गर्ने कुरामा जोड दिनुभयो ।
त्यस्तै कार्यक्रमका विशिष्ट अतिथि लुम्बिनी प्रदेशका पूर्व स्वास्थ्यमन्त्री तथा प्रदेश सांसद विष्णु पन्थीले वैज्ञानिक वन व्यवस्थापनकै माध्यमबाट कपिलवस्तुले २५ करोडभन्दा बढी राजस्व सङ्कलन गरेकोमा प्रशंसा समेत व्यक्त गर्नुभयो । सामुदायिक वन उपभोक्ता महासंघप्रति लक्षित गर्दै उहाले वैज्ञानिक वन व्यवस्थापनप्रति भ्रम नफैलाउन र केहि सञ्चार माध्यमहरुलाई हावा तालमा समाचार नलेख्न आग्रह समेत गर्नुभयो । उहाँले सबै मिलेर वैज्ञानिक वन व्यवस्थापनप्रति भएको गलत भाष्यलाई चिर्नुपर्नेेमा जोड दिनुभयो ।
त्यस्तै लुम्बिनी प्रदेश सभा सदस्य गिरधारीलाल न्यौपानेले वनको उचित व्यवस्थापन गरी सदुपयोग गर्न सके राष्ट्र समृद्धि हुने बताउनुभयो ।
कार्यक्रममा बोल्दै बाणगंगा नगरपालिकाका नगर प्रमुख चक्रपाणी अर्याल ले वन व्यवस्थापनमा व्यक्ति स्वयं सहभागी हुनु आवश्यक रहेको बताउनुभयो । सुशासन पारदर्शिता र इमान्दारिता आवश्यक रहेको र वन संरक्षण नहुँदा वातावरणमा नकारात्मक प्रभाव परेको प्रति चिन्ता व्यक्त गर्नुभयो ।
त्यस्तै महासंघका सल्लाहकार प्राध्यापक डाक्टर राजेश राईले वन व्यवस्थापनबाट देशलाई आर्थिक समृद्धिको दिशातर्फ लग्न सकिने बताउँदै व्यवस्थापनलाई दीर्घकालीन बनाउनुपर्नेमा जोड दिनुभयो ।
वैज्ञानिक वन व्यवस्थापन उपभोक्ता राष्ट्रिय महासंघ नेपालका अध्यक्ष रेनु सेनले वनको उचित उपयोगले अर्थतन्त्रमा महत्वपूर्ण योगदान पुग्ने बताउदै वैज्ञानिक वन व्यवस्थापनकै माध्यमबाट देशमा रोजगारी सिर्जना गर्न र वैदेशिक पलायन रोक्न वन नियमावली तत्काल लागू गर्न समेत आग्रह गर्नुभयो ।
त्यस्तै वैज्ञानिक वन व्यवस्थापन उपभोक्ता राष्ट्रिय महासंघ नेपाल का बरिष्ट उपाध्यक्ष डिल्ली रेग्मीले अहिले वन दोहनभन्दा संरक्षणको बाटोमा पुगेको बताउनुभयो । उहाँले वैज्ञानिक वन व्यवस्थापन गर्न सकेको खण्डमा स्वदेशमै रोजगारी सिर्जना गर्न सकिने बताउनुभयोे । वैज्ञानिक वन व्यवस्थापन प्रति भ्रम फैलाउन छोडेर वन को उचित व्यवस्थापन एवं सदुपयोगका निमित्त सहकार्य गर्न सामुदायिक वन उपभोक्ता महासंघलाई आग्रह गर्नुभयो ।
महासंघका महासचिव पर्साराम भुसालको सन्चालनमा सम्पन्न भएको कार्यक्रममा देशभरका विभिन्न सामुदायिक, धार्मिक, साझेदारी वनको प्रतिनिधि , सरकारी एवं गैर सहकारी संस्थाहरुका प्रतिनिधि , राजनितिज्ञ एवं विभिन्न सरोकारवालाहरुका १३०० भन्दा बढिको उपस्थिति रहेको थियो । महासंघका अध्यक्ष रेनु सेनले संस्थाकोे पाचौ वार्षिकोत्सव २०८३ श्रावण १२ गते सुदुर पश्चिम प्रदेशमा गरिने घोषणा समेत गर्नुभयो ।
