लक्ष्मण सापकोटा
कपिलवस्तु, कार्तिक १८
पिपरा महिला कोठी सेवा सामुदायिक वन उपभोक्ता समितिको नयाँ नेतृत्व चयनका लागि चुनावी सरगर्मी बढ्दै गएको छ । आगामी कार्तिक २२ गते हुने निर्वाचनलाई लक्षित गर्दै विभिन्न प्यानलका उम्मेदवारहरू प्रचारप्रसारमा व्यस्त भएका छन् ।
वनको आगामी नेतृत्वका लागि अध्यक्ष पदमा भिमसेन कार्की, झलक बहादुर कार्की, शंकर कार्की र राम प्रसाद भट्टराई गरी चार जना उम्मेदवारबीच प्रतिस्पर्धा हुने भएको छ ।
नेपाली कांग्रेस र राष्ट्रिय स्वतन्त्र पार्टी (रास्वपा)ले भिमसेन कार्कीको नेतृत्वमा संयुक्त प्यानल खडा गरेका छन् ।
त्यस्तै एमालेले झलक बहादुर कार्कीको नेतृत्वमा प्यानल गठन गरेको छ ।यसैबीच, माओवादी केन्द्र निकट राम प्रसाद भट्टराई अध्यक्षका लागि तथा हुम बहादुर परियारले कोषाध्यक्षका लागि उम्मेदवारी दिएका छन् ।
अर्कोतर्फ, एमाले निकट मानिने सोहि वनका निःवर्तमान सह–सचिव शंकर कार्कीले यसपालि स्वतन्त्र उम्मेदवारी दिएका छन् ।
निर्वाचन मण्डलका संयोजक खिम बहादुर जिसीका अनुसार गत असोज ३० गते गते सम्पन्न १६ औ वार्षिक साधारणसभा तथा छैठौँ अधिवेशन को नयाँ नेतृत्वका लागि हुने निर्वाचनमा ७४२ जना मतदाताले मतदान गर्ने छन् ।
