कपिलवस्तु, १८ कार्तिक – कपिलवस्तु उद्योग व्यापार संघले पहिलो पटक ‘प्रथम कपिलवस्तु व्यापार मेला एवम् कृषि पर्यटन तथा औद्योगिक प्रदर्शनी २०८२’को आयोजना गर्ने घोषणा गरेको छ। यस मेला र प्रदर्शनीको तयारीमा स्थानीयवासीहरूले खुशी व्यक्त गर्दै, यो महोत्सव कपिलवस्तु क्षेत्रको सामाजिक, आर्थिक र सांस्कृतिक विकासमा महत्वपूर्ण योगदान पुर्याउने विश्वास व्यक्त गरेका छन्।
महोत्सवको आयोजना कपिलवस्तु जिल्लाको मायादेवि रङ्गशालामा, मंसिर ५ देखि १७ गतेसम्म १३ दिनसम्म हुनेछ। महोत्सवले कपिलवस्तु र छिमेकी जिल्लाका उद्योगी, व्यापारी, किसान, उद्यमी र सर्वसाधारणलाई लाभान्वित गर्ने विश्वास व्यक्त गरिएको छ।
वडाध्यक्ष बावुराम अर्यालले यस महोत्सवलाई पूर्ण समर्थन दिने घोषणा गर्दै भने, “मायादेवि रङ्गशाला कपिलवस्तुको एक महत्वपूर्ण रङ्गशाला हो। यस महोत्सवले यस क्षेत्रलाई सबै सामु चिनाउनेछ र यसका लागि हामी सबैले एकजुट भएर कार्य गर्नुपर्नेछ।”
साथै, ‘प्रथम कपिलवस्तु डान्स स्टार’ प्रतियोगिता पनि महोत्सवमा समावेश हुनेछ, जसमा एक लाख एघार हजार एक सय एघार रुपैयाँको आकर्षक पुरस्कार राशिको घोषणा गरिएको छ। डान्स स्टार संयोजक असिम क्षेत्रीले यस प्रतियोगिताले युवा प्रतिभाहरूको उत्थान गर्ने उद्देश्य राखेको बताए।
वाणगगा ८ का वडासदस्य विश्वास जिसीले महोत्सवको महत्वलाई उल्लेख गर्दै भने, “यस महोत्सवले शिथिल अर्थतन्त्रलाई चलायमान बनाउने अपेक्षा राखिएको छ। संघीय सरकारले चालु आर्थिक वर्षमा ३ करोड रुपैयाँको बजेट छुट्टाएको छ, जसले मायादेवि रङ्गशालालाई स्तरीय बनाउन महत्वपूर्ण भूमिका खेल्नेछ।”
उद्योग व्यापार संघ कपिलवस्तुका अध्यक्ष खिमानन्द पौडेलका अनुसार, “यस महोत्सवको उद्देश्य कपिलवस्तुको आर्थिक, सामाजिक र सांस्कृतिक विकासमा योगदान पुर्याउनु हो। यसले स्थानीय उत्पादन, हस्तकला, कृषि सामग्री, प्रविधि, घरेलु उद्योग, मनोरञ्जन र संस्कृतिको प्रदर्शनी र प्रवद्र्धनमा केन्द्रित हुनेछ।”
महोत्सवको माध्यमबाट स्थानीय उद्योगी, व्यापारी, किसान र सर्वसाधारणबीच आपसी सहकार्य र सम्बन्ध सुदृढ हुने विश्वास संघले लिएको छ। कपिलवस्तुको विकासका लागि यस महोत्सवको महत्व अत्यधिक रहेको छ र यसले क्षेत्रको समग्र उन्नति र पहिचान बढाउन मद्दत पुर्याउने अपेक्षा गरिएको छ।
